Sa dilim ng gabi ika’y aking tanglaw
Bituing marikit nitong aking buhay
Sa pag-lalayag ko ikaw ang patnubay
Sa gitna ng dagat tangi kitang ilaw.
Sa simoy ng hangin aking nilalanghap
Ang tangi mong samyong hindi kumukupas
Sa ala-ala ko’y laging binabakas
Nagdaang kahapon sa piling mo liyag.
Kung nanariwa sa aking gunita
Ang binitiwan mong pangako at sumpa
“Hindi mag-babago, Hindi masisira”
Panatag ang loob, ako’y nag-tiwala.
“Anong kasalanan na aking ginawa?
Nag-taksil ba ako, ika’y may hinala?
Tinalikdan ko ba yaring aking sumpa
Ika’y mamahalin, saksi si Bathala.”
Ikaw ay lumisan hindi ko nalaman
Kung ano ang puno tunay na dahilan
Kapirasong nota na iyong iniwan
Walang sinasabi, “Patawarin lamang.”
Nag-iisa akong sakbibi ng lungkot
Tahimik ang gabi, puso’y kumikirot
Ating nakaraan ay hindi malimot
Sa aking gunita laging sumusurot
Sa pag-iisa kong labis na mapanglaw
Ang tanging aliwan ay iyong larawan
At bago matulog laging dinarasal
Mag-balik ka sana sa piling ko hirang.
Ako’y mag-hihintay, magbalik ka lamang
‘Di ko itatanong bakit ka lumisan
Kapiling lang kita pag-lubog ng araw
Sa buhay kong ito, labis na mapanglaw.
Composed by Jose Monzon
Comentários